O certame, no que participan un total de 37 establecementos, terá lugar do 4 ao 20 de novembro e a gran final celebrarase unha semana máis tarde, os días 25, 26 e 27.
26.10.2022. O presidente da Asociación Provincial de Empresarios de Hostelería e Turismo de Lugo (Apehl), Cheché Real, acompañado da alcaldesa de Lugo, Lara Méndez; da concelleira de Cultura e Turismo e vicepresidenta da Deputación de Lugo, Maite Ferreiro, e da deputada de Réxime Interior, Promoción do Territorio e Turismo da Deputación de Lugo, Pilar García, presentou esta mañá no Centro Cultural Vello Cárcere a décimo sétima edición do Concurso de Tapas de Lugo.
O certame está organizado pola Apehl co patrocinio do Concello de Lugo e coa colaboración de Estrella Galicia e do Consello Regulador da Denominación de Orixe Ribeira Sacra, así tamén estaban presentes no acto Ramón Rodríguez, representante de Estrella Galicia, e José Manuel Rodríguez, presidente do Consello .
Durante o acto, o presidente da Apehl amosou a súa satisfacción por celebrar un ano máis esta iniciativa, agradeceu “a participación de todos e cada un dos establecementos participantes” e destacou “o esforzo que o seu traballo implica durante estes días de campionato”.
FUNCIONAMENTO DO CONCURSO
Os prezos das tapas estarán entre 2 e 4 euros e poderanse degustar, como mínimo, de 13:00 a 15:30 h e de 20:00 a 22:30 h. Ante esta pequena variación dos prezos con respecto a outros anos, Real apuntou que “non é máis que unha consecuencia da situación actual que vivimos”.
Os consumidores votarán as tapas do concurso mediante o cupón de votación individual, que terá que ir selado polo establecemento correspondente e cuberto cos seus datos. A valoración é do 1 ao 5, sendo 1 a nota máis baixa e 5, a máis alta. Todos estes cupóns entrarán no sorteo de distintos premios.
A maiores, todos os locais terán a disposición dos clientes os folletos-pasaporte, que os consumidores deberán selar para poder participar nos sorteos desta edición. Se o folleto-pasaporte está selado como mínimo por 10 establecementos participantes optarase a unha estancia para dúas persoas en Hacienda Zorita, de Salamanca, e se o folleto-pasaporte está selado como mínimo por 20 establecementos participantes optarase a unha viaxe dunha semana para dúas persoas a Budapest.
O presidente da Apehl subliñou que “desta maneira os clientes non están obrigados a recorrer todos os establecementos e apostamos con estes premios por incentivalos a consumir as maiores tapas posibles”.
GALARDÓNS ÁS MELLORES TAPAS
O público será o encargado de seleccionar o gañador do concurso así como as 12 tapas finalistas. Farao a través dos cupóns de votación que poderá depositar ata o 20 de novembro nas urnas dispoñibles en todos os locais.
Por outra banda, un xurado profesional encargarase de escoller durante os días da final, 25, 26 e 27 de novembro, nos que as 12 tapas finalistas estarán a disposición do público xeral para volver a degustar, cinco títulos máis: primeiro premio, segundo premio, terceiro premio, mellor maridaxe Estrella Galicia e mellor maridaxe Ribeira Sacra.
LISTADO DE PARTICIPANTES
Os 37 establecementos que participan nesta edición do Concurso de Tapas de Lugo son os seguintes: