20.05.2022. O Centro do Viño da Ribeira Sacra acolleu esta tarde a presentación do Cume Tapas Erótico. A Asociación Provincial de Empresarios de Hostalería e Turismo (Apehl), organizadora do certame, elixiu nesta ocasión ás drag queens Lola Menta, Ketty Pinn e Manola Pirola para amadriñar o evento, que pretende facerlle unha dedicatoria especial ao amor libre e á diversidade de xénero.
Desde mañá sábado e ata o próximo 5 de xuño, un total de oito os establecementos competirán por converterse no campión do certame gastronómico da cidade do Cabe. A tapa gañadora será elixida cos votos do público.
Ademais das propostas culinarias, varios establecementos hostaleiros de Chantada, Monforte de Lemos, Pantón, A Pobra do Brollón, Quiroga, O Saviñao e Sober ofrecerán tarifas especiais durante os días do concurso. Así mesmo, sortearanse varios premios entre o público participante e están previstas tres actividades: unha quedada de vespas, o día 28 de maio; un concerto de Andrés Montes, o 5 de xuño, e unha charla sobre a diversidade de xénero, con data aínda por determinar.
O acto desta tarde foi presidido por Jacobo García, secretario de Apehl; Gerardo Criado, xefe territorial de Presidencia da Xunta en Lugo, e Gloria Prada, primeira tenente de alcalde do Concello de Monforte. A clausura correu a cargo da música do cantautor Andrés Montes.
